News

Seaimpíní Mionúir an Chontae faoi dhó!

November 8, 2018

Chuir foireann mionúir CLG An Spidéal cupán eile ar an mbord dóibh fhéin Dé Sathairn seo caite le bua slachtmhar ar Áth Cinn i gCluiche Ceannais Craoibhe mionúir b an Chontae. Is mór an éacht atá déanta ag an bhfoireann seo agus iad anois ina seaimpíní contae i bpeil agus in iománaíocht sa bhliain céanna.

Bhí buille buailte ar leads An Spidéil roimh an chluiche seo de bharr an gortú a tharla d’Éinne Ó hEochaidh a d’fhág ar mhaidí croise é agus a chroí briste nach bhfeadfadh sé cabhrú lena chomhghleacaithe.

Chuir leads an Spidéil an tús leis an gcluiche ceannais le cúl luath ó Liam Ó Conghaile áit ar phreab sé go cróga ar bhotún ó chúlbáire Áth Cinn. As sin amach bhí ceannas ag An Spidéal ar an gcluiche. Bhíodar ag imirt in aghaidh gála láidir sa chéad leath ach d’éirí leo a dhul 2-04 in aghaidh tada ag tráth amháin sa gcéad leath sin. Bhí ceannas iomlán ag Aodán Ó Curraoin agus Máirtín Beag ar lár páirce agus bhí Tomás Ó Fátharta ag déanamh tharr barr sa líne lán tosach. Ag cabhrú leis ansin bhí Oisín Breatnach, go gcaithfeadh sé go raibh ‘glue’ ar a chuid lámha aige mar nár chaill sé liathróid ar bith i gcaitheamh an tráthnóna agus seirbhís iontach dhá fháil acu ón gcúlaithe ar fad, Aodán Ó Droighneán agus Micheál Ó Curraoin ach go háirithe. Go deimhin ní mórán a bhí le déanamh ag Dónal Ó Maolallaigh, Dara Mac an Rí, Iarflaith Breathnach ná Pádraig Ó Mainnín ach chosain siad go cumasach nuair a tháinig ionsaithe Áth Cinn ina dtreo.

Buaileadh buille trom ar An Spidéal i rith an chéad leath sin nuair a chaith Ciarán Ó Laoi, a bhí ag imirt go maith, an pháirc a fhágáil de bharr droch bhuile a fháil ar an gcloigeann. Ach d’ardaigh leads An Spidéil a gcuid iarrachtaí, Déaglán Ó Droighneán agus Rónán MacChonnChoille ach go háirithe. Bhí An Spidéal ar a sáimhín só ag an am seo ach an lucht tacaíocht mhór fós imníoch faoin dara leath. Chríochnaíodar amach an chéad leath go maith chun tosaigh agus fiú nuair a thosaigh Áth Cinn ag fáil corr phointe sa dara leath níor lig leads Bhaile an Droichid a maidí le sruth agus d’aimsigh cúilíní go paiteanta. Go deimhin d’fhéadfaidís slad aisteach a bheith déanta acu dhá mbeadh seansanna ar chúil tógtha sa dara leath.

Ba mhór an chúis bróid mar sin do lucht tacaíochta An Spidéil nuair a chroch an Captaen Máirtín Beag Ó Droighneán an cupán go hard os cionn a chloigeann agus nuair a fuair Tomas Ó Fatharta gradam Laoch an Chluiche chomh maith.

Éacht nach beag mar sin don fhoireann cróga seo a bhfuil an t-uafás peile agus iomána imeartha acu le riar seachtainí anuas agus nach bhfuil deireadh lena séasúr go fóill ó tharla iad a bheith i gCluiche Ceannais Shraith na Cathrach san iománaíocht fós agus cuid acu páirteach i bhfoireann Sóisear C agus Idirmheánach an Chumainn a bhfuil cluichí tábhachtacha acu an deireadh seachtaine seo.

 

Is mór an buíochas agus an moladh atá ag dul do lucht bainistíochta na foirne, Micheál Ó Duinn, Nollaig Ó Neachtain, Déaglán Ó Tuathaill agus Dónal ‘Ducky’ Ó Fatharta. Bhí iarracht mhór mhillteach curtha isteach sa bhfoireann seo acu agus iad réitithe go proifisiúnta i gcaitheamh na bliana.

Tá buíochas ag dul d’urraithe na foirne agus an chumainn chomh maith don tacaíocht a fhaigheann an cumann i gcónaí. Ní féidir Tadhg Ó Conghaile ná an tUachtarán John Mac a ligeann i ndearmad ach oiread agus aon cheo a bhí ag teastáil ón bhfoireann dhá chuir ar fáil acu.

Ach níos mó ná sin is iad na himreoirí a chuaigh chun páirce le geansaithe An Spidéil orthu a bhfuil moladh ag dul dóibh. Léirigh siad céard is féidir a dhéanamh nuair a chuirtear iarracht, croí agus dea imirt ina n-iarrachtaí.

 

Painéal An Spidéil

1 Mághnus Breathnach

2 Aodán Ó Droighneán

3 Dónal Ó Maolallaigh

4 Dara Mac An Rí

5 Iarflaith Breathnach

6 Micheál Ó Curraion

7 Éinne Ó hEochaidh

8 Máirtín ‘Beag’ Ó Droighneán

9 Aodan Ó Curraoin

10 Rónán ‘Woody’ Mac Chonnchoille

11 Ciarán Ó Laoi

12 Déaglán Ó Droighneán

13 Liam Ó Conghaile

14 Tomás Ó Fatharta

15 Oisín Breathnach

16 Caoimhín Ó Céidigh

17 Pádraig Ó Mainín

18 Diarmuid Ó Tuathail

19 Séamus Ó Droighneán

20 Pádraig Ó Ciardha

21 Seán Ó Domhnaill

22 Seán Ó Curraoin

23 Cristóir Ó Márta

24 Ruaidhrí De Faoite

25 Séadna Ó Ceallaigh

Request a Demo

Let us show you how it works
  • This field is for validation purposes and should be left unchanged.